A Xunta aplicará o 'mulching' no incendio de Ribas de Sil para evitar arrastres de cinsas a ríos
A vexetación dominante é o piñeiro maduro ('Pinus pinaster') e matogueiras de breixo co que a Xunta augura unha boa rexeneración natural nos próximos meses.
Por Europa Press / Redacción | SANTIAGO DE COMPOSTELA | 16/09/2021 | Actualizada ás 14:18
A Xunta aplicará a técnica de 'mulching', consistente en crear unha cuberta protectora do chan con materiais como palla, no incendio de Ribas de Sil --que arrasou máis de 1.700 hectáreas-- para evitar arrastres de cinzas coas choivas.
Diso informou este xoves o director xeral de Defensa do Monte, Manuel Rodríguez, nun encontro cos alcaldes de Ribas de Sil, Miguel Ángel Sotuela; de Quiroga, Julio Álvarez; e da Pobra do Brollón, José Luís Maceda.
Estas técnicas de 'mulching' aplicaranse nas zonas máis danadas, que son entre o 5% e o 10% da superficie total afectada, segundo os datos da Consellería de Medio Rural.
Os técnicos do CIF de Lourizán observan un dano baixo na maior parte do terreo. Tamén constatan a falta de afección ás canles dos ríos Sil e Lor, xa que non conectan coas zonas arrasadas ao existir barreiras naturais que evitan o arrastre de cinzas ás canles fluviais.
Igualmente, recorrerase nalgunhas zonas ao 'helimulching', consistente en lanzar a palla desde helicópteros nas zonas de máis pendente no canto de facelo de forma manual. A vexetación dominante é o piñeiro maduro ('Pinus pinaster'), o que augura unha boa rexeneración natural nos próximos meses, así como matogueiras de breixo, tamén con boa capacidade de rebrote.
