A Xunta carga contra a protección do lobo porque a especie "goza de moi boa saúde" en Galicia
Reclaman unha dotación orzamentaria do Goberno para poder facer fronte ás axudas a gandeiros no caso de ataques.
- O Goberno mantense firme na protección do lobo pero non descarta medidas de axuda aos gandeiros
- Galicia, Asturias, Cantabria e Castela e León unen forzas para tratar de "deixar sen efecto" a prohibición da caza do lobo
Por Europa Press / Redacción | SANTIAGO DE COMPOSTELA | 22/09/2021 | Actualizada ás 13:29
A conselleira de Medio Ambiente, Ángeles Vázquez, cargou contra a orde que desde este mércores prohibe a caza do lobo en España porque entende que, ademais de considerala innecesaria nunha comunidade onde esta especie goza de "moi boa saúde", carece de dotación orzamentaria para aplicar as medidas e prestar apoio aos gandeiros que se verán "afectados".
"É un decálogo sen axudas para implantalo", sentenciou Vázquez a preguntas dos medios este mércores nun acto en Santiago, onde criticou unha orde que, ao seu xuízo, carrexa unha "gran inseguridade xurídica" e provoca a "desprotección" das Administracións autonómicas "á hora de poder estar á beira do gandeiro".
Así, a conselleira avanzou que, ademais de recorrer ante os tribunais a prohibición publicada no BOE o martes e que se fai efectiva este mércores, a Xunta demandará ao Goberno central que concrete os apoios económicos aos que poderán optar os gandeiros polos danos que causen os lobos ás súas explotacións. E é que, segundo Vázquez, a entrada en vigor da nova norma fai que os plans autonómicos decaian e, por tanto, tamén o fagan as ordes de axudas establecidas desde as comunidades.
"Agora é o goberno quen debe determinar como axudar ao gandeiro e quen debe asumir os custos", incidiu a conselleira, que puxo o acento en que tanto as condicións para a autorización excepcional de batidas como as establecidas para que os gandeiros protexan as súas explotacións "son inasumibles".
Ademais, advertiu que o aumento da poboación do lobo ante o fin do "control" que facía das poboacións a través das batidas tamén terá efectos negativos nas razas autóctonas de Galicia, como o cabalo galego ou a vaca cachena posto que a recomendación de que estean acompañados de mastíns "é algo inviable".
Neste sentido, considera que a entrada en vigor da orde ministerial, que, segundo Vázquez, non está "acreditada" por "estudos científicos", deixa ás comunidades en "unha situación complicada e delicada" e atenta contra a "biodiversidade".
