Comeza a oitava edición do Festival Mar de Mares, con máis de 30 actividades na Coruña

Unha nova edición, a oitava, do Festival Mar de Mares comezou este xoves co acto de inauguración e no marco dun programa que incluirá máis de 30 actividades. Entre elas, haberá gastronomía, fotografía, cinema, música, ciencia ou activismo. Esta edición terá lugar entre este xoves e o 26 de setembro e algunha das actividades deste ano desenvolverase ata o 5 de novembro, segundo a organización.

Manu San Félix (National Geographic), Barbara Veiga (fotógrafa e activista), Ángel León (3 Estrelas Michelín), Javi Olleros (2 Estrelas Michelín), Michel André (enxeñeiro bioacústico), Francisco Sánchez (referencia mundial de áreas mariñas protexidas) ou a Orquestra Reusónica Trío son algúns dos participantes deste ano.

A apertura oficial tivo lugar nun acto na Mariña coa presenza do biológo mariño e documentalista Manu San Félix e autoridades como o concelleiro de Turismo, Juan Ignacio Borrego, ou o delegado da Xunta na Coruña, Gonzalo Trenor. Coincidindo neste ano co inicio da década dos océanos da ONU, Mar de Mares buscará contribuír a impulsar as ciencias oceánicas a través das distintas actividades programadas, segundo expuxo Merce Carballo, directora do festival.

Inauguración do festival Mar de Mares. ANDY PEREZ | Fonte: Europa Press