O PPdeG, ante a polémica Convención Nacional, celebra o "rearmamento ideolóxico"
O número dous dos populares galegos, Miguel Tellado, cre que Sánchez "debe estar máis preocupado que hai 48 horas".
Por Europa Press / Redacción | SANTIAGO DE COMPOSTELA | 03/10/2021 | Actualizada ás 17:43
O secretario xeral do PPdeG, Miguel Tellado, celebra o "rearmamento ideolóxico" que supuxo a Convención Nacional do Partido Popular desta semana e considera que o presidente do Goberno, Pedro Sánchez, "ten hoxe motivos para estar máis preocupado que hai 48 horas".
Os populares galegos acudiron este fin de semana a Valencia cunha delegación dun centenar de persoas capitaneada polo seu presidente, Alberto Núñez Feijóo, para asistir á clausura deste evento itinerante que arrincou o pasado luns en Santiago de Compostela.
Desde alí, en declaracións difundidas aos medios, Tellado sinala que o partido sae "reforzado" para ser a "alternativa" ao actual Goberno de España. "O Executivo de Pedro Sánchez, lonxe de achegar de solucións, forma parte do problema", asevera.
O 'número dous' dos populares galegos subliña que desde Feijóo --o que máis tempo leva-- ata a presidenta da Comunidade de Madrid, Isabel Díaz Ayuso --a máis recente--, todos traballan por mandar unha mensaxe: "Nunha España que volve estar nunha situación complicada volvemos estar dispoñibles para traballar por asumir responsabilidades de Goberno".
Tellado tamén reivindica a unidade tras esta Convención despois de "un tempo" durante o cal o partido tivo que "lamerse as feridas por unha moción de censura inxusta e deplorable" que desaloxou a Mariano Rajoy da Moncloa. "Pero eses días termináronse", engade.
Ademais, o secretario xeral defende que Galicia está disposta a representar a "estabilidade institucional" da España autonómica, do mesmo xeito que o PPdeG está disposto a "axudar en todo" para sacar a Sánchez e a Unidas Podemos do Goberno.
