O PP denuncia que Pontevedra sae "castigada" das contas estatais: "O pouco que se inclúe non se executa"
Consideran que son un "curta e pega" das contas de 2021.
Por Europa Press / Redacción | SANTIAGO DE COMPOSTELA | 15/10/2021 | Actualizada ás 18:18
Os deputados nacionais e senadores do Partido Popular de Pontevedra denunciaron que a provincia sae "castigada" dos Orzamentos Xerais do Estado para o ano 2022, xa que todos os proxectos que se inclúen son un "curta e pega" das contas de 2021 que non se executaron.
Entre eles, refírense á circunvalación de Pontevedra, o nó dos bombeiros ou investimentos para Zona Franca na área de Vigo, "pero non inclúen un só proxecto estratéxico novo". "Uns orzamentos que desprezan á provincia de Pontevedra", trasladaron en rolda de prensa.
Ademais, subliñaron que a media de execución do orzamento en Galicia é o 16%, "unha cantidade ridícula" e incidiron en que "non só somos unha comunidade autónoma castigada, senón que tampouco gastan o que reservan nos orzamentos".
En concreto, a popular Ana Pastor afirmou que estes orzamentos "fan unha repartición clientelar para favorecer aos seus socios de goberno, mentres a provincia de Pontevedra volve ser a gran esquecida". Tamén criticou que a provincia quede fóra dos fondos de Resiliencia e Recuperación que proceden da Unión Europea e que se destinan para financiar proxectos estratéxicos.
Respecto da cidade de Pontevedra, Pilar Rojo dixo que "os titulares de hoxe e hai un ano son exactamente os mesmos". "Seguimos falando dos mesmos proxectos, que ademais xa estaban asignados e orzados en 2018 co Partido Popular".
Na zona sur da provincia, Javier Guerra lamentou que "estes orzamentos son unha humillación para unha área que precisa un apoio fundamental para a industria" e, con respecto ao norte, Juan Constenla tamén criticou que "sempre é a zona esquecida para os gobernos do PSOE", xa que o único que consignan para a Variante da Estrada e Pontecesures "son as pedreas da lotaría".
PRESENTARÁN ALEGACIÓNS
Desde o PP anuncian que presentarán alegacións aos orzamentos, acordados cos concellos e colectivos da provincia.
Pola súa banda, o deputado Javier Bas contrapuxo os dous modelos de xestión para afrontar a recuperación da crise, "o afán recadatorio de Sánchez para sufragar o seu malgasto" ou o modelo do PP, con "baixada de impostos, apoio ás familias e consolidación dos servizos públicos de calidade".
Por último, Elena Muñoz apuntou que o que reciben os veciños de Pontevedra do Goberno central "é indigno para a provincia porque supón un freo ao desenvolvemento".
