Feijóo destaca o impulso de Alfredo Conde, fillo predilecto da provincia de Ourense, ao "galeguismo integrador"
Segundo o presidente da Xunta, os deputados Alfredo Conde, Ramón Piñeiro, Carlos Casares e Benxamín Casal "personificaban un galeguismo apto para todos os galegos".
Por E.P. | OURENSE | 26/10/2021 | Actualizada ás 10:11
O presidente da Xunta, Alberto Núñez Feijóo, destacou este luns o impulso de Alfredo Conde "ao galeguismo integrador e fraterno que tende pontes entre terras e persoas".
Durante o acto de entrega do título honorífico de Fillo Predilecto da provincia de Ourense, no que tamén participou o presidente provincial, Manuel Baltar, entre outras autoridades, Feijóo lembrou que Alfredo Conde foi "protagonista e non relator" dunha fermosa historia naquel Parlamento cuxa efeméride se celebrou hai poucos días.
"Había un cuarteto de deputados procedentes do galeguismo independente do que formaba parte o que hoxe recibe a merecida homenaxe da súa xente", rememorou, subliñando que, lonxe de ser testemuñal, a presenza de Alfredo Conde, Ramón Piñeiro, Carlos Casares e Benxamín Casal, tiña o significado de "representar a continuidade e unha maneira grata de entender a devoción por Galicia, intensa e ao tempo afable". "Aqueles catro deputados personificaban un galeguismo apto para todos os galegos", abundou, ao longo da súa intervención.
Así mesmo, o responsable do Goberno galego afirmou que aquela intensa experiencia como deputado e despois como conselleiro de Cultura no Goberno de Fernando González Laxe, "non só foi frutífera no terreo político, senón tamén no literario".
"Este novo fillo predilecto da provincia de Ourense ten o inmenso mérito de lograr unha obra composta de libros que son embaixadores do noso", aseverou, antes de subliñar que a súa literatura comparte co galeguismo integrador esa apertura cara ao exterior, "ese camiño de ida e volta de influencias que tanto enriquece ao ser de Galicia".
