Aínda hai tempo para reservar unha escapada na ponte de Todos os Santos en Galicia
As taxas de ocupación son altas pero non se chega ao cheo en casas rurais nin hoteis.
Por E.P. | SANTIAGO DE COMPOSTELA | 27/10/2021 | Actualizada ás 13:07
As previsións de ocupación turística durante a ponte deste 1 de novembro, Día de Todos os Santos, sitúanse en torno ao 85% e o 95% para toda Galicia, segundo os datos que manexa o cluster de turismo da comunidade. En declaracións a Europa Press, o seu presidente, Cesáreo Pardal, destacou que xa hai establecementos, sobre todo de turismo rural, ao 100%, en zonas como a Costa da Morte e concellos como Allariz. Unha perspectiva moi distinta á ofrecida polo portal Tuscasasrurales.com, que daba conta dunha ocupación moito menor para o mesmo período.
Así, o 97% das casas rurais xa non teñen dispoñibilidade, de acordo cos seus números, e "podes atopar habitacións" pero non o aloxamento completo. Tamén queda espazo en hoteis, segundo apunta. En relación con isto, desde Hostalaría Compostela sitúan nunha porcentaxe bastante menor, en torno ao 60% de media, a ocupación na capital galega para esta ponte.
Un portavoz do colectivo, Carlos Regueiro, do Hotel San Lorenzo, sinala consultado por Europa Press que a cidade vén "dun verán moi bo grazas ao turismo nacional" e agora "estase animando o estranxeiro" e tamén o de congresos. Neste contexto, non espera un elevado número de reservas de última hora, tendo en conta que as previsións meteorolóxicas apuntan a unha borrasca que afectará á comunidade durante o fin de semana.
BONO TURÍSTICO
Pola súa banda, Cesáreo Pardal indica que o bono turístico da Xunta "volve funcionar ben" estes días, despois dun gasto de máis de 300.000 euros durante a anterior ponte festiva. En canto aos datos de ocupación (do 85-95% para toda Galicia), celébraos "despois de 19 meses de seca" e engade que espera que a tendencia "siga sendo á alza" nos próximos meses.
