Sindicatos advirten de posibles mobilizacións polos "custos disparados" de producir leite

Sindicato Labrego Galego (SLG) e a Federación Rural Galega (Fruga) advertiron da posible convocatoria de mobilizacións ante os "custos disparados" para os gandeiros de leite que provocan que se produza a perdas.

Así o avanzou o coordinador de Sectores Gandeiros de FRUGA, Elías Somoza, que anticipou que o próximo dous de novembro manterán unha reunión con produtores de leite en Guitiriz para abordar a situación que atravesa o sector ante a "crise de prezos" agravada polo "notable aumento" dos custos de produción.

"Imos ver que accións tomamos a partir desa reunión, o que está claro é que ten que haber unha repunta dos prezos para procurar a supervivencia da maior parte das explotacións lácteas galegas", ameazou. Fruga sostén, apoiándose en datos do Ministerio de Agricultura, que producir un litro de leite "custa entre 35 e 36 céntimos" cando o prezo que se paga por el é de 32 céntimos.

Pola súa banda, o Sindicato Labrego Galego solicitará á Consellería de Medio Rural a convocatoria "urxente" da Mesa do Leite, unha iniciativa que se levou ao rexistro da Xunta en Lugo. A secretaria xeral do sindicato agrario, Isabel Vilalba, apelou a que o propio Ministerio de Agricultura recoñece que os custos de produción son superiores, e a iso engádese que sobe a electricidade e parámetros moi importantes como son a alimentación e o combustible".

Denuncia que o prezo "está estancado á baixa", o que, segundo Vilalba, se produce de forma "artificial" porque a distribución "comezou a subir os produtos que vende".

Tractorada en Viana do Bolo (Ourense)