O delegado do Goberno pide á Xunta "implicación" na transición ecolóxica dos concellos
Expón a representantes municipais as axudas coas que contarán os 19 municipios galegos afectados.
- A Xunta volve responsabilizar ao Goberno de xerar unha situación de "caos enerxético"
- Endesa deixará todo o seu negocio de gas no horizonte de 2040
Por E.P. | SANTIAGO DE COMPOSTELA | 25/11/2021 | Actualizada ás 14:29
O delegado do Goberno en Galicia, José Miñones, pediu á Xunta "implicación" na transferencia de fondos para proxectos vinculados ao proceso de Transición Xusta, en liña co manifestado por alcaldes como os das Pontes e Cerceda, ambos os socialistas, na reunión celebrada no organismo central con representantes municipais dos concellos galegos.
Son en total 19 os municipios incluídos nos protocolos de Transición Xusta, aínda que á reunión asistiron 16. Ao termo do encontro, o delegado do Goberno en Galicia explicou que son tres as liñas de financiamento para o proceso de Transición Xusta. En concreto, 111 millóns de euros con fondos europeos e coas que a Xunta e Goberno deberán definir os proxectos a desenvolver.
A eles, súmase a primeira convocatoria do Plan de Recuperación con 91 millóns de euros a nivel estatal para infraestruturas nos concellos afectados. A esta cifra hai que engadir outros nove millóns de euros para asistencias técnicas a concellos, de cara a que logren fondos nas seguintes convocatorias.
A través da empresa pública Tragsa e con este investimento, o Executivo busca, segundo explicou, un seguimento completo, coa elaboración do documento, o control da adxudicación e a execución. Sobre a mesma, dixo que será especialmente importante para os concellos máis pequenos.
José Miñones avanzou tamén convocatorias en diferentes liñas para proxectos empresariais a principios de 2022, vinculadas aos Orzamentos Xerais do Estado. Tamén lembrou que o Goberno impulsará programas de formación en dúas etapas nas zonas afectadas. Na primeira fase haberá cursos de xestión directa. Na segunda, o Goberno transferirá 20 millóns de euros ás comunidades autónomas para esta materia.
Os concellos implicados e que contarán con convenios de Transición Xusta son os seguintes: As Pontes, A Capela, Xermade, San Sadurniño, As Somozas, Mañón, Monfero, Moeche, Cerdido, Vilalba, Cabanas, Ortigueira, Muras, Ferrol; Cerceda, Ordes, Carral, Tordoia e A Laracha.
