Galicia rexistra o segundo novembro máis frío das dúas últimas décadas
As temperaturas máis baixas concentráronse na Mariña oriental, A Fonsagrada e Os Ancares.
Por Europa Press / Redacción | VIGO | 03/12/2021 | Actualizada ás 17:57
Galicia rexistrou este ano o segundo novembro máis frío das dúas últimas décadas, cunha temperatura inferior en 1,1 graos menos da esperada, ademais dun mes moi seco.
O informe climatolóxico de Meteogalicia sinala que o inicio do pasado mes estivo marcado por un tempo inestable e chuvascos, tras que se deu paso a un período anticiclónico e sen grandes cambios durante máis de dúas semanas para terminar cunha entrada de aire frío e vento do nordeste con predominio de altas presións.
Ademais, este foi o segundo mes de novembro máis frío desde 2002, con mínimas consideradas moi frías e unha anomalía negativa das medias de 1,1º. Aínda que os rexistros foron baixos en toda a comunidade, os valores máis fríos concentráronse na Mariña oriental, A Fonsagrada e Os Ancares. Mentres, os rexistros máis altos observáronse en Serra da Capelada e a comarca de Xallas.
Así mesmo, novembro foi un mes moi seco, con choivas concentradas en poucas xornadas que coincidiron cos primeiros días do mes e o paso da borrasca Arwen, cunha precipitación media acumulada de 82 litros por metro cadrado.
En comparación co período de referencia 1981-2010, novembro rexistrou un déficit de precipitacións do 63% con respecto ao valor climático normal. Con todo, non foi unha excepción, xa que en 2015 nese mesmo mes choveu un 65% menos do habitual.
Aínda que a tónica xeral na comunidade foi a escaseza de precipitacións, observáronse grandes contrastes. Así, mentres no sur e o suroeste de Galicia a porcentaxe de choivas foi un 80% inferior ao normal, na Mariña chegáronse a rexistrar precipitacións que mesmo duplicaron os valores habituais na época.
