Detectada unha mancha de gasóleo no río Lérez ao seu paso por Pontevedra
Non puido ser depurada por mor das condicións meteorolóxicas.
Por Europa Press / Redacción | SANTIAGO DE COMPOSTELA | 08/12/2021 | Actualizada ás 20:11
Persoal do Concello de Pontevedra detectou unha mancha de gasóleo no río Lérez, á altura do Mercado de Abastos, tras o aviso de veciños dun forte cheiro a gasóleo, segundo informa o consistorio, Nun comunicado, explica que o departamento do Ciclo da auga tratou de coñecer a orixe da vertedura á rede de pluviais, sen obter resultados, pero apunta á limpeza dalgunha caldeira.
"Tentouse minimizar a mancha, pero resultou imposible polas condicións meteorolóxicas", explica sobre o sucedido e tras o seguimento durante toda a xornada dunha vertedura que se expandiu no río, entre a ponte de Santiago e o da Barca. O mesmo foi localizado ao redor das 11,40 da mañá pola Policía Local, que se trasladou ao lugar xunto a técnicos da empresa concesionaria do servizo da auga, Viaqua, en resposta ao aviso dos veciños que alertaban ce un forte cheiro a gasóleo na zona. Tamén se informou ao servizo de control de verteduras de Augas de Galicia da Xunta.
