A feira Etiqueta Negra regresa a Pontevedra con catas dos produtos máis 'gourmet' de Galicia

Os produtos 'delicatessen' de Galicia danse cita na feira Etiqueta Negra, que este venres 10 abrirá as portas da súa quinta edición no Recinto Feiral de Pontevedra. Nel agardan un centenar de expositores que, en palabras da organización, "destacan pola singularidade e alta calidade dos seus produtos". A feira contará ademais cun amplo programa de actividades, tales como cociña en directo, presentacións de produtos, degustacións, maridaxes e catas para saborear Galicia.

Como preludio á feira, esta mañá tivo no Centro de Interpretación das Torres Arcebispais (CITA) a actividade “1906 / Etiqueta Negra”, dirixida a 30 profesionais da hostalaría da cidade e da comarca e coa concellaría de Promoción Económica e Cervezas 1906 como impulsores. Esta iniciativa tivo por obxectivo impulsar a cociña colaborativa co fin de"xerar riqueza e valor na comunidade local a través da alianza con provedores e outros profesionais do sector". 

O acto arrincou coa mesa redonda “Gastronomía Colaborativa”, na que participaron Iñaki Bretal, chef do Eirado da Leña; Carlos Ávila, responsable de Cultura de Cervexa de Hijos de Rivera, así como os produtores Xesús Mazaira e Milagros Castro propietarios da queixaría Airas Moniz e das conservas Los sabores del Camino, respectivamente.