O polbo galego viaxa a Barcelona a todo vapor
O innovador produto galego de polbo cocido ao vapor esperta moita curiosidade entre os asistentes a Alimentaria, o Salón Internacional de Alimentación e Bebidas que se celebra estes días en Barcelona. O seu artífice defende a marca "polbo" e non a de "pulpo" que defende unha minoría.
Por GC Tendencias | Barcelona | 01/04/2014 | Actualizada ás 11:00
GC Tendencias falou con Daniel Atanes, que actualmente está alí para representar A Pulpeira, unha marca da empresa Frigoríficos Arcos, con sede en O Carballiño, dedicada á venda de polbo dende hai máis de cen anos.
Cando a finais de 2013 Daniel e o seu irmán empezaron a vender polbo cociñado ao vapor, sorprenderon ata ao seu propio pai, tamén polbeiro. “Pero agora está encantado” afirma Daniel. “O uso do vapor potencia o sabor e conserva mellor as propiedades nutricionais que o polbo cociñado en auga. É un produto de alta gama, dunha calidade moi alta.”
Iniciativas como as de A Pulpeira significan que o polbo non só ten que consumirse na feira, como marca a tradición. Agora tamén pode consumirse na casa dun xeito sinxelo e cómodo.
Así, o polbo ao vapor pódese mercar en bolsa ou en prato de madeira; o consumidor só ten que quentalo e engadir sal, aceite e pemento. Precisamente esta facilidade que ofrece o polbo precociñado esixe un cambio nos hábitos do consumidor galego: “A xente recea de quentalo; é unha barreira que hai que superar.” Non en van, hai máis mercado de polbo fóra de Galicia que dentro.
"Algo tan noso"
Daniel comprácese do éxito comercial de “algo tan noso” como é o polbo, que non pulpo: “Eu estou completamente de acordo coa decisión da Real Academia Galega” declara Daniel, en referencia á negativa da RAG a admitir o termo español pulpo. “Polbo debe quedar, e non debemos avergoñarnos” incide Daniel, en referencia aos dobres sentidos, e engade con humor: “Mira, aquí en Cataluña non teñen problemas por poñer ‘pis en venda’!”.
O polbo cocido ao vapor de A Pulpeira estará presente en Alimentaria ata o 3 de abril na Fira Barcelona, no stand da Consellería do Medio Rural e do Mar da Xunta de Galicia.
