Feijóo presume de feminismo co anuncio de 34 millóns para o emprendemento feminino
Comprométese a rematar coa fenda de xénero no sector da ciencia.
Por Europa Press / Redacción | Santiago de Compostela | 14/12/2021 | Actualizada ás 22:17
O presidente da Xunta, Alberto Núñez Feijóo, presumiu de axudar ao emprego feminino cun investimento de máis de 34 millóns de euros en 2022 para impulsar o emprendemento feminino, a inserción laboral e seguir avanzado cara á igualdade real.
Unha achega que, segundo precisou, inclúe o Plan emprega muller --34,3 millóns de euros-- centrado na formación para impulsar a inserción laboral das mulleres. Neste enmárcase o Programa Emega que, cun orzamento de máis de 4 millóns, aposta polo emprendimiento feminino, especialmente no ámbito tecnolóxico.
Nesta mesma liña, lembrou tamén a modificación o pasado mes de xullo da normativa para garantir a igualdade real entre homes e mulleres no ámbito universitario e da investigación, entre cuxas novidades está, por exemplo, acabar coa histórica discriminación que sufrían as investigadoras á hora de optar a unha praza pública polos períodos de non produción científica, por baixas por maternidade ou embarazo.
Durante a entrega do Premio María Josefa Wonenburger, da que informou a Xunta nun comunicado, Feijóo reiterou o compromiso da Administración autonómica para acabar coa fenda de xénero no sector científico e tecnolóxico. Así, lembrou que máis da metade dos alumnos que escollen o Bacharel científico seguen sendo homes. "E eles tamén son maioría no ámbito do I+D a nivel empresarial", engadiu para sinalar que apenas o 7% das patentes solicitadas en 2019 foron pedidas por mulleres.
