Xunta e Concello de Mondoñedo colaboran na mellora da seguridade viaria no Camiño do Norte

O vicepresidente primeiro da Xunta, Alfonso Rueda, asinou co alcalde de Mondoñedo, Manuel Otero, o convenio de colaboración entre o Goberno galego e o Concello para a mellora da seguridade viaria peonil na antiga N-634, que conta cun orzamento de preto de 262.000 euros bianual. Ao acto tamén acudiu a directora de Turismo de Galicia, Nava Castro.

O último tramo da antiga N-634, de titularidade municipal e destinada ao tránsito de vehículos, é o tramo inmediatamente anterior á entrada na zona urbana de Mondoñedo. Forma parte da ruta do Camiño do Norte e ante a carencia de beirarrúas, beiravías e iluminación pública, requiría levar a cabo as actuacións necesarias para garantir unha mobilidade segura tanto de veciños como de peregrinos desta ruta xacobea. Alfonso Rueda destacou que, con esta colaboración, preténdese converter esta antiga estrada nun "Camiño Seguro".

Para conseguir este obxectivo realizáronse traballos na ampliación da chaira, nas canalizacións de drenaxe, na iluminación e na pavimentación das beiravías e beirarrúas.

NOVO PLAN DIRECTOR DOS CAMIÑOS

Tras os investimentos dos últimos anos, o vicepresidente primeiro remarcou que a Xunta traballa nun novo Plan Director de Camiños que marque a folla de ruta ata 2027, co obxectivo de continuar ofrecendo aos peregrinos a mellor imaxe de Galicia.

Nesta liña, puxo como exemplo que este ano o Goberno galego seguirá completando a rede pública de albergues con 6 novas infraestruturas en Vilasantar (Camiño do Norte), no Saviñao coa reforma do Pazo de Diomondi (Camiño de Inverno), e nas instalacións da Casa do Mar de Ferrol (Camiño Inglés), xunto con tres albergues na Vía da Prata coa rehabilitación do mosteiro de Oseira en San Cristovo de Cea e novos edificios de acollida aos peregrinos en Piñor e Riós.

Deste xeito, a rede pública pasará a contar con 78 albergues neste Xacobeo, aos que se sumaría outro na Coruña, se o concello cede a parcela.

No Camiño do Norte, unha vez rematadas as obras de rehabilitación da Casa Reitoral de Vilasantar, ás que a Xunta destinou 737.800 euros para crear un albergue de 30 prazas, a ruta pasará a contar con 10 albergues da rede pública cun total de 405 prazas.

CAMIÑO DO NORTE

O Camiño do Norte foi recoñecido en 2015 como Patrimonio de Humanidade pola UNESCO, o máximo recoñecemento que pode recibir un ben cultural. Das case 180.000 'compostelas' seladas o ano pasado, case 9.600 corresponden a peregrinos que transitaron por esta ruta.

Por iso, o vicepresidente primeiro confía en que este 2022 sexa o despegamento do Camiño de Santiago a nivel internacional coa chegada de peregrinos de todo o mundo que ata agora, debido ás restricións de mobilidade pola pandemia do coronavirus, non puideron camiñar a Galicia para gozar deste ano Santo dobre.