"É un insulto e unha esmola", di a CIG sobre o acordo alcanzado coa patronal de residencias privadas
Acusa a UGT e CCOO de ser "cómplices".
Por Europa Press / Redacción | SANTIAGO DE COMPOSTELA | 04/04/2022 | Actualizada ás 13:06
A CIG criticou este luns o acordo de convenio alcanzado a semana pasada entre a patronal de residencias e centros de día privados de Galicia, UGT e CC.OO., un documento que considerou unha "esmola" ante as reclamacións dos traballadores e tras o que acusou aos sindicatos e á Xunta de ser "cómplices" da súa situación.
Nunha rolda de prensa, Beatriz Hernández, do comité de folga, asegurou que sindicatos asinantes, patronal e Xunta "equivocáronse ao considerar que esta folga tiña como fin único unha negociación colectiva" e que se podía "arranxar cunha esmola".
"Esta folga foi o froito de anos e anos de explotación e humillación que sufrimos os traballadores do sector de residencias", destacou Beatriz Hernández, que "despois de ver como eramos chamados esenciais e recibir aplausos" volveron ser " os esquecidos". "Decidimos deixar de vivir axeonllados, levantar a cabeza e reclamar dignidade", subliñou.
Tras unha semana de folga no servizo, o 25 de marzo produciuse unha mediación do Consello Galego de Relacións Laborais entre os traballadores e as empresas, que derivou nun acordo de novo convenio que foi asinado por CC.OO. e UGT, pero non pola CIG.
"Esperabamos un pouco de respecto", dixo Hernández, fronte ao que se atoparon a "unha patronal miserable e mezquina" que, entre outras cousas, "non estaba disposta a falar da saúde das traballadoras".
CARENCIAS DO TEXTO
Do texto acordado, a CIG critica cuestións como que non se aborde a consecución do 100 por cen do salario en caso de baixa por enfermidade, "obrigando" aos traballadores a acudir ao seu posto de traballo en caso de ter enfermidades como unha gripe, co consecuente efecto negativo que podería ter na saúde dos residentes, "persoas vulnerables".
Do mesmo xeito, reclamaban "unha redución de xornada para rebaixar a carga brutal de traballo", e "os arrogantes e miserables da patronal só ofertaron" unha redución de sete horas do cómputo global de todo o ano e outros sete o ano seguinte.
En canto á subida salarial pactada, do 6,5%, é "a que xa había por convenio", cun 1% de subida para o ano seguinte sen posibilidade de revisión salarial. "É un insulto para os traballadores", dixo Beatriz Hernández.
"COLABORADORES DIRECTOS" DA EXPLOTACIÓN
Por iso, cualificou as súas formulacións de "ruíns e miserables" e acusou aos sindicatos que asinaron o acordo de "colaboradores directos da explotación dos traballadores".
