Unha queima sen medidas de seguridade, orixe do incendio forestal en Leiro
O lume afectou 0,14 hectáreas. No que vai de ano, a Policía Autonómica leva investigadas 14 persoas como presuntas autoras de incendios forestais.
Por Europa Press / Redacción | Ourense | 07/04/2022 | Actualizada ás 19:44
Unha queima sen medidas de seguridade adecuadas está detrás do incendio ocorrido o martes 5 de abril en Leiro (Ourense) e que afectou 0,14 hectáreas. No que vai de ano, a Policía Autonómica leva investigadas 14 persoas como presuntas autoras de incendios forestais.
Os axentes do Grupo de Investigación de Incendios da sede de Ourense, xunto con axentes do Distrito XI Ribeiro-Arenteiro, resolveron a autoría dun incendio rexistrado o día 5 no lugar de Barro-Gomariz.
No transcurso das investigacións, a Policía Autonómica tomou declaración a un home que realizaba unha queima sen as debidas medidas de seguridade.
Na extinción deste lume, interviñeron un axente, tres brigadas, dúas motobombas e unha avioneta. As dilixencias foron remitidas ao Xulgado de Instrución de Garda de Ribadavia.
