Galicia e o norte de Portugal forman o observatorio do medio mariño con maior cobertura de Europa
Entre as funcións están as do desenvolvemento de modelos predictivos para a interpretación dos fenómenos mariños.
Por Europa Press / Redacción | VIGO | 22/06/2022 | Actualizada ás 11:34
A conselleira do Mar, Rosa Quintana, inaugurou este mércores o evento final do proxecto europeo Radar on Raia, que converte á eurorrexión Galicia e norte de Portugal na área co observatorio do medio mariño con maior cobertura espacial de Europa.
Así o sinalou a responsable autonómica, facendo fincapé en que esta iniciativa supón un avance nos servizos de medición e predición do estado do mar grazas á ampliación da infraestrutura da rede de observación trasfronteriza coa introdución da tecnoloxía de radares de alta frecuencia.
Coordinado polo Centro Tecnolóxico do Mar-Fundación Cetmar, este proxecto naceu co fin de introducir melloras no ámbito da observación do medio mariño, segundo explicou a Xunta nun comunicado.
Por iso, Quintana subliñou o valor de Radar on Raia para o desenvolvemento da actividade investigadora relacionada co medio costeiro e para tarefas como o desenvolvemento de modelos predictivos para a interpretación dos fenómenos mariños.
A isto engadiu que este tipo de información tamén é interesante para a toma de decisións por parte das administracións públicas no desenvolvemento dos servizos relacionados coa protección do medio ambiente costeiro, así como para a consulta por parte dos cidadáns.
Quintana tamén destacou a experiencia de Galicia neste ámbito, xa que leva máis de 30 anos tomando medidas das variables ambientais co fin de ter un mellor coñecemento da franxa costeira. O proxecto Radar on Raia púxose en marcha en 2019 co fin de actualizar e estender fóra da fronteira de Galicia a tecnoloxía de radares de alta frecuencia do Observatorio Costeiro de Galicia, operativo desde 2011.
