Alertan da entrada "na oitava onda" da Covid: "as variantes non son iguais e non se deben tratar da mesma maneira"

O portavoz da Sociedade Española de Médicos Xerais e de Familia, Lorenzo Armenteros, alertou este luns que se entra "na oitava onda" de Covid-19 tras pasar "unha sétima case fantasma". "Aínda que non temos datos da maioría dos positivos, por coronavirus, porque soamente coñecemos a incidencia en maiores de sesenta anos, os casos que vemos nas consultas, os novos casos en xente nova e os casos que podían ser sumados de autotests que realizan os pacientes, estariamos nunha oitava onda", argumentou Armenteros.

E xa unha oitava porque, matizou, pasouse " unha sétima onda case fantasma, desaparecida porque non había datos suficientes, así que de forma epidemiolóxica estariamos nunha oitava onda". "Ese pico que se está dando nas dúas últimas semanas podería indicarnos que hai unha nova onda en cernes e xa está a empezar a subir", dixo o portavoz dos médicos de familia.

O facultativo lucense advertiu que "delegar a seguridade sobre os cidadáns é complicado porque están moi cansos, hai un cansazo pandémico e a xente quere gozar do verán, das aglomeracións, pero isto dá lugar a un gran número de contaxios", avisa.

VARIANTES

Un aspecto sobre o que fai especial fincapé é que as "características das variantes son diferentes; así a B A-5 é moi infecciosa e a sintomatoloxía é maior". "Os síntomas son maiores e obriga a ir a consultas de Atención Primaria e a un maior ingreso hospitalario. As variantes non son iguais e non se deben tratar da mesma maneira", sentenciou.

Lorenzo Armenteros incidiu na necesidade de seguir "utilizando máscaras en interiores, no transporte público e cando se produzan aglomeracións". Finalmente apelou, á súa vez, ao uso dos tapabocas "de forma solidaria, de tal forma que cando se teña calquera sintomatoloxía respiratoria usar as máscaras".

Unha enfermeira abre un test de antíxenos para realizar unha proba covid | Fonte: Joaquin Corchero - Europa Press