Vandalizan coas cores de España un letreiro en Santiago que lucía a bandeira LGBT+
O Concello de Santiago reivindica que este tipo de actos "non teñen cabida nunha cidade como Compostela".
Por Europa Press / Redacción | SANTIAGO DE COMPOSTELA | 12/07/2022 | Actualizada ás 10:52
Un letreiro que sinaliza a entrada na cidade de Santiago polo barrio de San Lázaro foi vandalizado coas cores da bandeira de España para substituír a insignia arcoiris que decoraba a sinalización desde o mes de xuño.
A sinalización, que dá a benvida á capital galega ás persoas que acceden á cidade na ruta que realizan os peregrinos polo Camiño Francés, está pintada desde o luns coas cores da bandeira de España.
Tanto este como outros letreiros indicativos de entrada na urbe compostelá estaban decorados desde mediados do mes de xuño cun fondo coas cores da bandeira arcoiris con motivo da celebración do Orgullo LGTBIQ+.
O Concello de Santiago emitiu un comunicado no que manifesta o seu rexeitamento ao acto vandálico, rexistrado na madrugada do luns. O executivo local informa de que o sinal xa foi limpado para restaurar o seu estado orixinal e reivindica que este tipo de actos "non teñen cabida nunha cidade como Compostela, caracterizada polo respecto á diversidade e a igualdade".
