O lume de Laza avanza sen control e ameaza o núcleo das Taboazas, en Chandrexa
No municipio de Laza arderon xa unhas 740 hectáreas en poucas horas.
Por Europa Press / Redacción | OURENSE | 10/08/2022 | Actualizada ás 15:56
A Consellería de Medio Rural informou de que foi solicitada a declaración de 'situación 2' como medida preventiva a causa do incendio forestal iniciado na parroquia de Camba, en Laza (Ourense).
O motivo é a proximidade das chamas deste lume ás casas do núcleo das Taboazas, no concello limítrofe de Chandrexa de Queixa. Con todo, o alcalde desta localidade, Francisco Rodríguez, sinala que "non hai perigo por agora" para as casas das Taboazas, onde se activou a Situación 2 pola proximidade do lume ao núcleo.
En declaracións a Europa Press, explicou que estivo na zona ao redor das 17,30 horas. Alí, non foi necesario desaloxar a ninguén polo momento, un lugar con cinco casas habitadas e con maior poboación nesta época de vacacións. Apunta que, por agora, hai "tranquilidade" entre os veciños.
Iso si, asegura que o lume que afecta a Chandrexa de Queixa, iniciado na parroquia de Queixa, "non está controlado en absoluto" cun avance debido ao vento que levou o lume ata o limítrofe municipio de Montederramo.
LUMES INTENSOS
Os incendios forestais nos municipios ourensáns de Laza, Chandrexa de Queixa e Carballeda de Valdeorras continúan co seu avance sen control, de forma que case triplicaron a superficie arrasada en tan só unhas horas na mañá deste mércores, polo que xa queiman en conxunto unhas 1.380 hectáreas.
Segundo a última actualización provisional da Consellería de Medio Rural, no municipio de Laza arderon unhas 740 hectáreas.
