CC.OO. rexeita a privatización da residencia de maiores de Cerdedo porque "empeora as condicións de traballo"

A organización sindical Comisións Obreiras (CC.OO.) rexeitou a privatización da residencia de maiores de Cerdedo ao considerar que este tipo de operacións supón a obtención de beneficios por parte dunha empresa á conta de reducir postos de traballo e salarios, empeorar as condicións de traballo e diminuír a calidade do servizo.

O sindicato lamentou que a Xunta acabe de investir 2,2 millóns de euros nas instalacións para que agora sexa unha empresa privada a que se faga cargo do servizo.

"A Consellería de Política Social e Xuventude quere vender esta privatización como un aforro no custo respecto da xestión directa, algo absolutamente falso porque as empresas privadas en ningún caso prestan o servizo gratis", criticou CC.OO.

Ademais, tamén puxo en dúbida outro argumento do Goberno galego, que asegura que esta fórmula cumpre cos criterios de xestión e intervención institucional e suporá o mellor control de calidade, eficacia e eficiencia na xestión dos servizos sociais.

"Que llo digan aos familiares dos residentes que sufriron a morte dos seus familiares ou a desatención grave nas residencias privadas que xa operaban en Galicia (durante a pandemia). Como se pode xustificar a mellor xestión e a mellor intervención privatizando o servizo que atende a persoas maiores e dependentes, deixando en evidencia aos propios servizos públicos? O coidado das persoas non pode ser un negocio en mans de multinacionais ou fondos voitres", engadiu o sindicato.

Neste sentido, sinalou que durante a pandemia, os centros sociosanitarios de xestión pública directa foron os "máis eficientes e eficaces" na atención aos maiores, mentres que as residencias privadas "foron as que tiveron os peores resultados acumulados", tanto en número de falecidos como de persoas desatendidas.