Aínda non chegou o pico da onda da gripe a Galicia

O conselleiro de Sanidade, Antonio Gómez Caamaño, confirmou este mércores que a onda de gripe continúa cunha intensidade "baixa", pero con "tendencia crecente". No entanto, será este xoves cando coñeza o último informe con datos actualizados que elabora a Dirección Xeral de Saúde Pública.

A preguntas dos medios durante unha visita ao Hospital de Conxo, en Santiago, Gómez Caamaño volveu a facer un chamamento á vacinación tras destacar que case hai 800.000 persoas inmunizadas en toda Galicia. Segundo cifras do Observatorio de Saúde Pública, son 785.420. O conselleiro recoñeceu que agora "sobe moi amodo" o índice de vacinación ao estar "a finais" da campaña desta tempada, que se prolongou ata o 31 de xaneiro.

En calquera caso, o titular de Sanidade insistiu nese chamamento a vacinarse "porque diminúe moito a gravidade das infeccións" e permite baixar as asistencias nos centros de saúde e os ingresos nos hospitais.

Ademais, Gómez Caamaño recoñeceu a necesidade de "intensificar" as campañas de vacinación entre os propios profesionais sanitarios, xa que a porcentaxe de inmunización este ano é só do 49,33 por cento. "Temos aínda que mellorar", admitiu o conselleiro, a pesar de que Galicia está mellor que "o resto de España".

Unha muller vacínase durante o inicio da campaña de vacinación fronte á gripe e a Covid-19 | Fonte: Rober Solsona