Axentes especializados tentan esclarecer o crime de Elisa Abruñedo en Cabanas nove anos despois
O corpo da muller de 46 anos apareceu a 200 metros da súa casa con varias puñaladas e tras ser violada.
Por Europa Press / Redacción | SANTIAGO DE COMPOSTELA | 26/08/2022 | Actualizada ás 18:11
Axentes da Unidade Central Operativa (UCO) da Garda Civil realizan estes días diversas pescudas e investigacións na zona de Lanvandeira, no municipio de Cabanas, no lugar no que apareceu fai case nove anos o corpo sen vida de Elisa Abruñedo.
O cadáver desta veciña da zona foi localizado a tan só 200 metros da súa vivenda tras varias horas en paradoiro descoñecido. O corpo presentaba diversas puñaladas e as probas realizadas posteriormente revelaron que fora violada.
Fontes consultadas por Europa Press trasladaron que axentes da Benemérita procedentes de Madrid traballaron durante as últimas xornadas na zona para tratar de esclarecer un crime cometido hai case unha década.
Elisa Abruñeda tiña 46 anos, estaba casada e era nai de dous fillos. No seu corpo foron localizadas varias mostras de ADN que se relacionan co responsable da súa violación e asasinato, pero que non puido ser localizado por non ter as Forzas e Corpos de Seguridade do Estado unha mostra biolóxica do mesmo.
A Garda Civil sempre mantivo que este caso estaba aberto e que continuaban coas investigacións, que se mantiveron durante varios anos coa recollida de mostras de ADN, tanto de veciños da zona como doutros municipios de Ferrolterra.
