A Torre de Hércules renace como destino turístico tras a pandemia

As visitas guiadas nocturnas á Torre de Hércules da Coruña superaron o número de asistentes de 2018 e 2019. Durante a actual tempada planificáronse 11 visitas guiadas ao faro milenario, en quendas de 20 persoas. En total, participaron máis de 200 usuarios, case o dobre das que asistiron nos anos previos á pandemia.

As citas comezaron a finais de xuño, durante a semana do 13º aniversario da inclusión do monumento na listaxe de Patrimonio Mundial. Este mércores 31 de agosto terá lugar a última sesión nocturna da tempada; as entradas poranse á venda ás 09,45 horas no Centro de Interpretación. A ruta guiada comezará ás 20,30 horas. Consiste nun paseo de hora e media que inclúe unha pequena incursión polo Parque Escultórico e finaliza na Rosa dos Ventos.

O Consorcio de Turismo está a estudar a posibilidade de continuar coas visitas a tempada 2023, tratando de ampliar o seu número coa intención de chegar a máis usuarios.

PRAZAS MUNICIPAIS

Noutra orde de feitos, o Concello da Coruña, a través da Concellaría de Deportes, oferta 2.181 prazas para actividades da rede de Escolas Deportivas Municipais, segundo informa. Delas, 580 son para escolas de nova creación. Ás actividades xa existentes súmanse outras 15, ampliando a oferta deportiva para todos os públicos. Entre elas, están tenis de mesa e bádminton no Club do Mar de San Amaro, tiro con arco e natación artística no Casino, ou tríatlon, waterpolo e bujutsuen Riazor.

Hai actividades dirixidas a un público específico como poden ser flexibilidade, que se impartirá en Riazor e será para máis de 60 anos; e tonificación, dirixidas a máis de 18 anos.