A Xunta restaura o retablo da capela de San Lois na Estrada cun investimento de máis de 15.000 euros

A Consellería de Cultura, Lingua e Xuventude completou a restauración do retablo da capela de San Lois, situada na parroquia de Orazo, no municipio pontevedrés da Estrada, cun investimento superior aos 15.000 euros. A actuación foi visitada este sábado polo conselleiro José López Campos, quen salientou o compromiso da Xunta coa preservación do patrimonio histórico-artístico de Galicia.

Segundo informou o Goberno galego, os traballos permitiron recuperar a autenticidade orixinal da peza, un retablo de estilo neoclásico, elaborado en madeira de castiñeiro e con policromías oleosas e douradas.

A intervención abordou a eliminación das capas de repintado e purpurina que alteraban a estética orixinal do conxunto, así como o tratamento e protexido de elementos metálicos e a revisión de consolidacións no soporte estrutural. Para o tratamento aplicouse unha resina acrílica que permite garantir a súa conservación a longo prazo.

Durante a visita, o conselleiro destacou que a recuperación deste retablo é unha mostra do interese da Xunta por intervir directamente no territorio, prestando apoio a pequenos templos e elementos artísticos de valor local que forman parte da identidade cultural galega.

"Traballamos por conservar e poñer en valor o noso patrimonio para que a cidadanía poida gozar del e, ao mesmo tempo, contribuímos á dinamización cultural e turística dos concellos", afirmou López Campos.

Esta actuación insírese dentro dun programa máis amplo de intervencións patrimoniais que a Xunta desenvolve en distintas parroquias e concellos galegos co obxectivo de frear o deterioro de bens culturais e reforzar a súa función social e identitaria.