Pontón está disposta a apoiar o PGE do Goberno pero só "se non se discrimina aos galegos"

A portavoz nacional do BNG, Ana Pontón, manifestou "toda a vontade" da formación nacionalista para negociar co Goberno de Pedro Sánchez os orzamentos do Estado para 2023, pero advertiu de que hoxe en día "non contan" co voto afirmativo do deputado no Congreso, Néstor Rego, porque "non dan un trato xusto a Galicia".

"A día de hoxe o proxecto de orzamentos do Goberno central non pode ter o si do BNG porque Galicia recibe un trato inxusto, co investimento estancado mentres outras comunidades teñen incrementos substanciais", sinalou Pontón, en referencia a Andalucía (2,3%), Cataluña (3,5%), Valencia (5%) ou Madrid (13,4%). Así, advertiu de que o BNG "non pode permitir unha nova discriminación que ignora as necesidades do país".

Para a portavoz nacionalista, ademais, hai un feito que hai que "ter moi en conta", e é que os investimentos orzamentarios quedan "sen executar nunha parte moi significativa ano tras ano". "De forma sistematica, o que está no papel non pasa á realidade, o que supón unha dobre discriminación cos galegos", denunciou.

Así, a dirixente nacionalista advertiu de que o proxecto presentado por Moncloa ten tamén "clamorosas ausencias" para Galicia en canto a proxectos estratéxicos para Galicia, como son en particular infraestruturas como a saída ferroviaria desde Vigo para conectar con Portugal, finalizar o eixo atlántico e dar unha conexión modernizada por tren entre A Coruña e Ferrol, xunto con pór en marcha un servizo ferroviario de proximidade que conecte a Galicia interior.

Tamén bota en falta investimentos para a rexeneración integral das rías e reclama que se "cumpra" o compromiso de tres novos xulgados específicos de para a loita contra a violencia de xénero en Santiago, Lugo e Ourense.

Ana Pontón indicou que estas son "algunhas das razóns" polas que, a día de hoxe, o BNG "non pode dar o seu apoio aos orzamentos do Estado, porque discriminan a Galicia na repartición de investimento territorializado". Con todo, tende a man para ter unha "negociación que permita incluír estes proxectos" nos orzamentos xerais e, igualmente, que "se fagan realidade, porque son necesidades do país".

"GALICIA NON SE MERECE OS MALOS TRATOS QUE ESTÁ A SUFRIR"

A secretaria xeral do PP galego, Paula Prado, denunciou que o Goberno central, a pesar de que os seus integrantes acoden semanalmente á Comunidade galega, "está en Galicia pero non con Galicia" á vista do proxecto de orzamentos xerais que presentou para o próximo ano.

"Son uns orzamentos que están estancados, un estancamento en Galicia, que non ten investimentos novos, que se repiten ano tras ano, que non se executan", advertiu, durante unha visita a Viveiro, a dirixente popular.

Así, sinalou que hai "un desprezo absoluto a Galicia". "Todos os días temos un ministro ou ministra, o propio (Pedro) Sánchez" esta semana, sinalou Prado, para lamentar que o executivo "está en Galicia pero non está con con Galicia".

"Pedímoslle que estean con Galicia, que poñan encima da mesa as infraestruturas importantes", apuntou Prado, quen censurou que esta comunidade "non se merece os malos tratos que está a sufrir" por parte do Goberno.

Así mesmo, dixo que "canto máis os analizan, máis se enfadan". "Galicia está absolutamente esquecida por parte do Goberno de España, que deixen de vir a Galicia a insultar aos galegos", incidiu a dirixente popular, quen dixo que os orzamentos "non achegan nada" e son os que demostran "a política en cifras".