Caen os nacementos un 2,4% en Galicia mentres soben as defuncións ata o 7,8%
Son os últimos datos que publica o Instituto Nacional de Estatística.
Por Europa Press / Redacción | SANTIAGO DE COMPOSTELA | 19/10/2022 | Actualizada ás 10:37
Galicia rexistrou 9.525 nacementos ata agosto, o que supón un descenso do 2,4% respecto ao mesmo período do ano anterior, e unha diminución superior, do 9,27%, en comparación cos oito primeiros meses de 2019, segundo os datos que publica este mércores o Instituto Nacional de Estatística (INE).
Mentres, as defuncións ata a semana 39 do ano, isto é, ata finais de setembro, alcanzaron as 26.204, que son un 7,8% máis en variación anual e un 12,38% máis que no mesmo período do ano previo á pandemia.
Así se desprende de dúas estatísticas que publica o INE, por unha banda a estimación mensual de nacementos correspondente ao mes de agosto de 2022 e doutra banda a estimación do número de defuncións semanais ata a semana 39 do presente exercicio.
Para o conxunto estatal, os nacementos nos oito primeiros meses de 2022 caeron un 0,92% e as mortes ata a semana 39 (finais de setembro) incrementáronse un 4,12%.
