15 concellos reciben a bandeira verde polo seu "compromiso co medio ambiente e a paisaxe"

A Xunta de Galicia outorgou a 15 concellos galegos o distintivo 'Bandeira verde', co que pretenden premiar aquelas localidades con boas prácticas ambientais e de protección e conservación da paisaxe.

O acto de entrega escenificouse este venres en Sober (Lugo) --concello tamén premiado--, presentado pola conselleira de Medio Ambiente, Territorio e Vivenda, Ángeles Vázquez. Alí destacou que cada ano son máis os concellos que se suman a esta iniciativa.

"Se na primeira edición de 2020 se entregaron dúas bandeiras verdes, este ano son 15 os concellos distinguidos, seis máis que en 2021", explicou.

Nove dos galardoados revalidan a distinción, concretamente as localidades de Alfoz, Curtis, Moaña, Mondoñedo, Ordes, Outeiro de Rei, Parada de Sil, Porto do Son e Sober; mentres que seis conséguena por primeira vez: Laracha, Cervo, Muros, Ribadeo, Ribeira e Touro.

Na súa intervención, Ángeles Vázquez animou a todos os concellos a presentarse a este galardón, "que pretende sumar e reflectir o esforzo que as entidades locais fan polo futuro de Galicia" grazas a accións que permiten "ordenar o territorio, protexer o medio ambiente e a paisaxe; afrontar o cambio climático e mellorar a eficiencia enerxética; xestionar de forma responsable os residuos municipais; e sensibilizar á cidadanía".

A titular de Medio Ambiente lembrou ademais a "aposta" da Xunta por unha "Galicia verde". Así, detallou, en 2023 a Administración autonómica investirá 80,6 millóns de euros en actuacións para preservar os espazos naturais e apoiar aos concellos na xestión dos residuos, na mellora de espazos públicos ou na corrección de impactos paisaxísticos.