O PPdeG dará a coñecer a todos os candidatos ás alcaldías de Galicia antes de que acabe o ano
Rueda desprazarase polas catro provincias galegas para explicar os "históricos" orzamentos da Xunta para 2023.
Por E.P. | SANTIAGO DE COMPOSTELA | 26/10/2022 | Actualizada ás 20:14
O PPdeG ten previsto que "antes de final de ano", aínda que "poida haber algunha excepción", xa se coñezan os candidatos que nas eleccións do 28 de maio de 2023 aspirarán ás alcaldías de Galicia.
Así o asegurou este mércores ante os medios de comunicación o presidente dos populares galegos, Alfonso Rueda, antes de participar nunha reunión ordinaria do Comité de Dirección do PPdeG que se celebrou na sede do partido en Santiago.
"Creo que somos a única forza política que xa presentou aos sete candidatos", celebrou o líder popular, tras o cal garantiu que nos próximos meses o partido continuará con esta "tarefa" de dar a coñecer as cabezas de lista nos diferentes concellos. Serán públicos, dixo, "antes do 31 de decembro, por pór unha data".
O obxectivo é que, a partir de entón, as candidaturas poidan "empezar a traballar" da man dos veciños ben para mostrarse como "alternativa sólida", alí onde non gobernan, ou ben para "dicirlles o que queren seguir facendo" nos respectivos concellos.
ORZAMENTOS "HISTÓRICOS" PARA 2023
O outro tema fundamental da reunión da tarde deste mércores foi a aprobación a semana pasada no Consello da Xunta dos orzamentos autonómicos para 2023, que xa arrincou a súa tramitación parlamentaria cos debates en comisión, nos que espera "enriquecelos aínda máis".
En palabras de Rueda, trátase dunhas contas "históricas", principalmente polo "gasto social", que el mesmo se encargará de explicar polo catro provincias galegas, tal e como comprometeu. A previsión é que estean aprobados en "tempo e forma" para que entren en vigor a día 1 de xaneiro.
