Ferido un traballador na descarga dun barco na illa de Sálvora
Cae un bloque de "dimensións considerables" nas pernas de dous operarios en Vigo
Por E.P. | SANTIAGO DE COMPOSTELA | 04/11/2022 | Actualizada ás 14:58
Un traballador resultou ferido cando participaba na descarga dun barco na illa de Sálvora, polo que tivo que ser trasladado por unha embarcación de Salvamento Marítimo a terra, desde onde foi evacuado en ambulancia ao hospital.
Un particular alertou ao 112 Galicia ás 11,15 horas de que un traballador sufrira un golpe na cabeza cando realizaba tarefas de descarga nun buque situado no peirao da illa de Sálvora. Segundo informaron os servizos de emerxencias, o ferido golpeouse cun cabo en mal estado que se soltou.
Desde o 112 solicitouse a colaboración no operativo de Urxencias Sanitarias de Galicia-061, de Salvamento Marítimo, do Servizo de Gardacostas de Galicia e da Policía Nacional. Os efectivos de Salvamento Marítimo encargáronse de levar ao ferido á costa de Aguiño, onde o recolleu unha ambulancia na que foi trasladado ata o Hospital do Barbanza.
FERIDOS DOUS TRABALLADORES EN VIGO
Outro accidente laboral tivo lugar na mañá deste venres. Nesta ocasión, produciuse no quilómetro 7 dos CV-812 ao seu paso por Vigo, e dous operarios resultaron feridos ao caerlles encima un bloque de conxelados de "dimensións considerables".
Os servizos sanitarios deron aviso ao 112 e indicaban que ambos os implicados presentaban dor nas pernas, pero non se atopaban atrapados. Participaron tamén axentes da Policía Nacional, e informouse por se resultase necesaria a súa intervención, á Policía Local e a Protección Civil de Vigo.
