Critican que Ourense tamén queira competir con Vigo no uso de animais durante o Nadal

Amigos da Terra demanda ao Concello de Ourense que non use animais no desfile de Nadal. Unha medida que se anunciou cando ducias de cidades e vilas galegas teñen asinado mocións prohibindo no seu termo municipal o uso de animais en espectáculos e festas, e logo de que o propio concello ourensán xa acordara  en pleno como concello libre de estos espectáculos.

A organización ecoloxista considera "lamentable que, a estas alturas, aínda existan concellos que non entendan que o uso de animais nestes espectáculos supón un exemplo evidente de maltrato animal". Así, destacan que moitas son especies exóticas, fora dos seus hábitats naturais, e "reducidos a ser usados como simple divertimento ignorando o estres e sufrimento ao que son sometidos".

"Estas prácticas (tristemente aínda legais) non deixan de ser unha parte do problema engadido do tráfico ilegal de animais que segue aumentando á sombra do mercado legal", indican nun comunicado. Neste sentido, lamenta que tamén o concello de Ourense decida entrar na competición iniciada por Vigo para ver que cidade "consegue liderar o ranking do maior impacto ambiental das festas de Nadal".