Un proxecto galego sobre queimas controladas recibe o apoio do Goberno
Por E.P. | SANTIAGO DE COMPOSTELA | 19/11/2022 | Actualizada ás 12:31
Un proxecto de xestión de combustibles forestais baseado na implementación de "plans de herbivorismo pírico" con gandaría extensiva, que conta con participación galega, foi apoiado pola Fundación Biodiversidade do Goberno.
O proxecto, no que participa a Asociación Forestal de Galicia e a Universidade de Santiago, xunto con entidades de Navarra e Andalucía, desenvolverá modelos piloto de protección contra os incendios forestais durante o próximos tres anos.
Segundo destacou a Asociación, o obxectivo é innovar e modernizar a práctica combinada de queimas prescritas e o pastoreo con gando extensivo, tal e como se realiza noutros países afectados polo risco de grandes incendios forestais.
Deste xeito, o proxecto desenvolverá experiencias e plans pilotos en distintos municipios de Galicia, nos que aplicará "novas tecnoloxías como os peches virtuais". Con este sistema, trátase de controlar a localización do gando a través de colares GPS que emiten sinais de advertencia para os animais no caso de que tenten saír das coordenadas establecidas para o pastoreo.
A Asociación explicou que as experiencias e os plans piloto que se desenvolverán medirán o efecto das queimas controladas, combinadas con pastoreo, sobre a recuperación da vexetación e a evolución dos hábitats.
Ademais, destacou como punto de interese do proxecto a valoración do impacto das queimas controladas sobre arboledo que, a baixa intensidade, poida estar presente nas zonas de queimas controladas, coa finalidade de valorar a compatibilidade desta práctica coa conservación do arboledo.
