Rosa Quintana apela á unidade da cadea mar-industria ante retos como o veto á pesca de fondo
Por Europa Press / Redacción | SANTIAGO DE COMPOSTELA | 26/11/2022 | Actualizada ás 18:55
A conselleira do Mar, Rosa Quintana, apelou este sábado á unidade da cadea mar-industria na defensa dos seus intereses ante os retos que afectan á súa competitividade, así como "para seguir demandando con forza poder desenvolver a súa actividade".
Expresábase así durante a clausura das XXVI Xornadas de pesca de Celeiro, onde ademais incidiu na importancia de eventos como este para impulsar esa suma de sinerxías "para facer fronte aos retos de futuro da actividade marítimo-pesqueira".
Entre eses retos, mencionou a descarbonización e transición enerxética cara a alternativas viables de combustible. "Unha cuestión que se debe abordar de forma xusta, equilibrada e asumible", destacou.
Tamén fixo referencia á protección dos ecosistemas mariños vulnerables, "cuestión que se debe abordar tendo en conta o impacto na actividade marítimo-pesqueira".
Respecto deste último punto, Quintana destacou o caso de veto á pesca de fondo establecido pola Comisión Europea, "pois difire da necesidade de equilibrio entre os aspectos ambientais e socioeconómicos que defende a Política Pesqueira Común (PPC).
Tamén sobre isto lembrou as achegas realizadas pola comunidade galega ao Goberno central para fundamentar o recurso interposto ante o Tribunal de Xustiza da Unión Europea.
Con todo, incidiu en que Galicia considera necesario que solicite a suspensión temporal desta prohibición, "pois sería un bo respaldo para o sector e evitaría consecuencias como a caída de ao redor do 50 % nas descargas da frota e de máis do 20 % no caso da facturación".
Por último, Rosa Quintana puxo en valor a importancia social e económica da actividade marítimo-pesqueira e o seu papel crave na economía.
Tal e como recollen nun comunicado, o sector ten un volume xeral de produción e comercialización duns 9.000 millóns de euros, segundo reflicten as táboas input-output pesca-conserva galegas 2019, elaboradas por encargo da Xunta ao grupo de investigación en Economía Pesqueira e Recursos Naturais Ecopesca da Universidade de Santiago de Compostela.
Estas táboas tamén rexistran a influencia do sector do mar no resto de actividades económicas, "posto que 76 das 83 ramas da actividade económica galega teñen relación co sector marítimo-pesqueiro".
