Vítima de acoso sexual para acceder a un posto de traballo no Carballiño

A Audiencia Provincial de Ourense xulgou este mércores a un home acusado de abusar sexualmente en febreiro de 2020 dunha muller, coa que mantiña unha relación de amizade, na localidade do Carballiño. Na vista, a vítima ratificouse en que lle dixo varias veces que "non quería" e que se "bloqueou".

Os feitos xulgados na Audiencia Provincial de Ourense remóntanse a febreiro do 2020 cando o acusado e a vítima, que mantiñan unha relación de amizade de máis dunha década segundo corroboraron ambos na vista, quedaron por motivos laborais e dirixíronse ao domicilio del, na localidade do Carballiño.

Unha vez no interior da vivenda, segundo o escrito de acusación, o home "empezou a tocala por todo o corpo e a dicirlle que lle gustaba", mentres "ela pedíalle que parase". Posteriormente, a pesar da oposición verbal, agrediuna sexualmente.

Segundo o relato do acusado na vista, era amigo da muller dende hai moitos anos e quedaban "moitas veces", aínda que "nunca propuxeron nada" nun ámbito sexual. Non entanto, recoñeceu que aínda que, "non pretendía ter relacións, se vía posibilidades por parte dela, non as descartaba".

No seu relato fronte ao que sostén Fiscalía e o perito xudicial, o acusado afirmou que "foi consentido". Segundo esgrimiu, estaban na súa vivenda, onde a convidou co pretexto de manter unha conversación sobre un posto laboral, xa que el é viaxante de cosmética. O diálogo tivo lugar no salón, despois ela marchouse ao baño e el á habitación onde, segundo o seu relato, foise tamén a vítima que, segundo el, "sentou" ao seu lado, houbo "tonteo" e "xurdiu".

Ademais, o acusado dixo que "en todo momento houbo colaboración por parte dela, porque pola contra non seguiría". Segundo a súa versión, a muller molestouse despois, unha vez que abandonaron o domicilio para compartir unha cea nun restaurante da vila. Alí, el díxolle que "non daba o perfil" para o posto polo que estaba a preguntar. "Sentoulle mal e creo que aí se enfadou", argumentou engadindo que ao día seguinte tiveron un intercambio de mensaxes no que ela lle dixo: "non sabes onde che metiches".

Pola súa banda, a vítima confirmou que despois de anos de relación laboral había tamén un vínculo de amizade, pero "xamais" maior que ese. Nese contexto laboral relatou que o home a instou a citarse no Carballiño para tratar o tema do novo centro de traballo no que ela aspiraba a traballar e que unha vez na vila, díxolle que se fosen ata a súa casa, que lle presentaría á súa familia, algo que ela creu porque "xa coñecía a unha irmá e un sobriño". Con todo, "no domicilio só estaban os cans".

A muller relatou que ela non bebía alcol e el non tiña auga, polo que lle deu unha cervexa sen alcol, e xa sentados no salón, comezou o suceso. "Díxome que tiña sentimentos cara a min e eu díxenlle que estaba equivocado. Empezoume a tocar as costas e quedeime como parada", declarou a muller que asegurou que o home lle preguntou "se prefería ter relacións cun coñecido ou cun descoñecido".

Asegurou que entrou nun estado de "shock", "nun bloqueo", pero que "desde o principio" díxolle que "non quería facer nada e que ía esnaquizar unha amizade de anos". "Estaba como perdida, eu non me cría o que estaba a suceder, se me din que me tirase por unha xanela nese momento creo que o faría, só quería saír de alí", manifestou.

Nesa situación contou que se meteu ao baño e unha vez saíu o home levouna ata a habitación onde se produciu a suposta agresión, tras a cal asegurou que lle pediu que quedase a durmir e, ao negarse díxolle que fosen cear xuntos. "Eu non sabía onde estaba e só unha curmá e unha amiga sabían que ía ata Carballiño, pero non ata a súa casa, e el díxome que ninguén me ía a reclamar", expuxo a vítima, asegurando que sentiu "medo constante" e que "aceptou para disimular".

Audiencia provincial de Ourense | Fonte: Arquivo