Acordo co goberno luso para rehabilitar a implatar un carril bici na ponte sobre o río Miño, entre Salvaterra e Monçao

O Consello da Xunta autorizou este xoves a firma do convenio de colaboración co Ministerio de Transportes, Mobilidade e Axenda Urbana para a rehabilitación e a ampliación da ponte internacional sobre o río Miño, entre Salvaterra de Miño e Monção.

O investimento total da actuación ascende a máis de 757.000 euros, e abarcará a rehabilitación estrutural da ponte e a redacción do proxecto da implantación dun carril bici. A Xunta e o Goberno luso financian ambas as actuacións ao 50%, polo que o Goberno galego achega máis de 378.000 euros.

Ao tratarse dun convenio internacional, a tramitación materialízase coa firma de dous acordos: un inicial entre os Estados español e portugués, que habilita a Xunta a abonar o seu parte do custo das actuacións; e outro entre a Xunta e o Goberno de España, a través do Ministerio de Transportes, polo que o Executivo autonómico comprométese ao seu parte do financiamento das actuacións.

Este último é o convenio cuxa firma autorizou este xoves o Consello da Xunta, que debe ser subscrito con posterioridade á firma do convenio entre os Gobernos español e portugués. O Executivo autonómico prevé que esta firma se poida materializar nos próximos días.

OUTROS ACORDOS

Noutra orde de asuntos, a Xunta autorizou a colaboración co Concello de Coirós para dotar de saneamento municipal ao núcleo de Anta cun investimento de case 330.000 euros. E deu luz verde á colaboración co Concello de Brión para acondicionar un tramo da AC-543.

Río Miño ao seu paso por Arbo | Fonte: arquivo