A XLV edición dos 'Cadernos Ramón Piñeiro' pon o broche ao ano de Florencio Delgado Gurriarán

A Xunta conclúe o ano de Florencio Delgado Gurriarán coa presentación da XLV edición dos 'Cadernos Ramón Piñeiro' titulada 'Estudos arredor de Florencio Delgado Gurriarán', unha obra coa que o Centro Ramón Piñeiro para a Investigación en Humanidades réndelle unha homenaxe ao autor de Valdeorras.

O secretario xeral de Política Lingüística da Xunta, Valentín García remarcou o "gran nivel académico dos estudos reunidos neste volume", que cualificou como "unha das achegas substantivas do ano na análise da biografía e a escritura do autor valdeorrés".

Así mesmo, indicou que, con este tipo de obras, o Centro Ramón Piñeiro "demostra o prestixio do seu equipo de investigadores, que soubo coordinar, con admirable profesionalidade, os mellores analistas para iluminar a figura do intelectual e poeta Florencio Delgado Gurriarán".

Así, con esta publicación a Xunta puxo punto e final a unha "extensa programación" de máis de 150 accións realizadas durante todo o ano en colaboración coa Real Academia Galega, o Consello da Cultura Galega e demais empresas, entidades e concellos que quixeron formar parte desa homenaxe.

'Estudos arredor de Florencio Delgado Gurriarán' forma parte da colección de 'Cadernos Ramón Piñeiro', que reúne máis dunha vintena de artigos nos que se "analiza en profundidade" a vida e obra do escritor.

Os ensaios integrados no libro tratan "moitos dos principais" temas e motivos da bibliografía do autor, como breves corpus epistolares, a súa relación co Partido Galeguista e Galeuzca, coa Real Academia Galega ou coa lírica de Cabanillas.

Ademais, analizan as influencias poéticas de Amado Carballo na súa escritura ou na súa obra como tradutor, entre outras tantas realidades abordadas con diferentes enfoques e tratamentos.

A colección dos 'Cadernos Ramón Piñeiro', que comezou no ano 2003, encádrase no proxecto de investigación e recuperación de textos literarios e xornalísticos galegos.

Na actualidade, e desde hai anos, o seu director é Armando Requeixo e coa presente entrega alcanza xa os 45 volumes. Estes cadernos abordan diversos aspectos do pensamento e da cultura de Galicia, nomeadamente a bibliografía de escritores relevantes da literatura galega.