O BNG denuncia a "precariedade" de traballadores e usuarios dunha residencia da Coruña
Pide coñecer o número de inspeccións levadas a cabo pola Consellería de Sanidade.
Por E.P. | SANTIAGO DE COMPOSTELA | 22/12/2022 | Actualizada ás 13:03
O Bloque Nacionalista Galego (BNG) levou á Cámara do Parlamento de Galicia a situación de "precariedade" e "vulneración de dereitos dos traballadores e usuarios" da residencia Concepción Arenal, un centro de maiores coruñés de titularidade pública cuxa xestión foi privatizada.
A portavoz do BNG de dereitos sociais, Olalla Rodil, denunciou que esta residencia "é coñecida por estes continuos agravios, por incumprir os cocientes de persoal, ademais de por non ter persoal de enfermaría dispoñible as 24 horas, tal e como establece a normativa".
O centro, que pertenceu ao grupo Domus Vi, está xestionado na actualidade por outra compañía. "Desde a entrada da nova empresa, que percibiu uns nove millóns de euros públicos, os traballadores iniciaron unha campaña de mobilizacións para demandar o cumprimento dos seus dereitos laborais", expuxo Rodil.
A parlamentaria do BNG explicou que o persoal do centro, que se ve "sobrecargado", conta que "algúns usuarios baixan sen asearse a xantar ou, directamente, xa non baixan porque só dous auxiliares deben levantar, asear e vestir a un total de 30 residentes dependentes". "Reúnanse coa empresa e os representantes dos traballadores", solicitou Rodil á secretaria xeral técnica da Consellería de Política Social, María Francisca Gómez Santos.
Así mesmo, Rodil demandou coñecer o número de inspeccións levadas a cabo pola Consellería de Sanidade e se a Xunta realizou algún tipo de sanción fronte aos continuos "agravios", preguntas que non tiveron unha resposta concreta do Goberno do Partido Popular (PP).
