O Paseo do Cantiño na Illa de Arousa supón un grave risco, con zonas erosionadas que poderían levar ao seu afundimento

O Concello da Illa de Arousa pediu a Portos de Galicia a reparación inmediata do Paseo do Cantiño, xa que, segundo indicou, o seu actual estado supón "un grave risco" para a seguridade dos usuarios desta contorna.

Nunha nota de prensa, o consistorio municipal indicou que, tras anunciar Portos unha actuación neste lugar, este martes o goberno local comprobou que o paseo presenta "visibles e amplas gretas" a través das que se pode observar que parte do paseo "está no aire", "ao levar a erosión do mar a cimentación da estrutura".

Por este motivo, o concello pontevedrés asegurou que "deriva a Portos de Galicia toda responsabilidade derivada dun evidente deixamento nas súas competencias do mantemento desta infraestrutura".

Ademais, remarcou que o goberno local "leva anos reclamando un investimento importante" neste paseo para liquidar "os serios problemas estruturais que presenta".

"A erosión do mar pode derivar nun afundimento en determinadas zonas desta infraestrutura, situación que require unha concienzuda supervisión técnica que determine as medidas a adoptar para previr incidentes que poñan en risco a integridade das persoas que transitan por esta contorna", apuntou o alcalde da Illa, Carlos Iglesias.

Así mesmo, suxeriu a Portos que precinte o paseo en caso de non ter previsto actuar e lamentou que a administración autonómica "permita tomarlle o pelo aos veciños da Illa anunciando unha actuación que finalizaría en xaneiro cando apenas mandaron un par de operarios a pasar o día". "Non repararon absolutamente nada e tampouco fixeron tarefas de limpeza", denunciou.

Paseo do Cantiño na Illa de Arousa | Fonte: Páxinas Galegas