En Allariz xa poden pagar impostos a través de Correos
O concello chegou a un acordo coa sociedade estatal para facilitar os pagos de tributos á veciñanza a través das oficinas postais e das carteiras e carteiros rurais.
Por Galicia Confidencial | Allariz | 19/01/2023 | Actualizada ás 09:00
Á presentación, que tivo lugar os pasados días en Allariz, asistiu a Alcaldesa, Cristina Cid Fernández, e o Xerente de Produtos e Servizos da área Noroeste de Correos, Xosé Chorén.
Grazas a este convenio, a veciñanza poderá pagar as obrigas tributarias e outras de Dereito Público xestionadas polo consistorio nas 21 oficinas de Correos da provincia de Ourense ou en calquera das 2.370 oficinas de Correos distribuídas por todo o Estado.
Con este servizo de Correos, os alaricanos e alaricanas contan cunha canle áxil e sinxela á hora de cumprir cos seus abonos. Ademais, este acordo permite que poidan abonalos comodamente a través dos 144 carteiros e carteiras rurais da provincia, sen necesidade de desprazarse.
UN SERVIZO QUE FUNCIONA XA NOUTROS CONCELLOS
O pago de tributos é un dos novos servizos co que Correos pretende facilitar o día a día dos cidadáns, independentemente de onde vivan, aproveitando a cobertura territorial da rede de oficinas e carteiros e carteiras rurais dos/as que dispoñen.
