Amancio Ortega entra no negocio das telecomunicacións a través de Telxius Telecom
Telefónica e Pontegadea fanse co 100% de Telxius tras comprar o 40% en mans de KKR por 215 millóns.
Por Europa Press / Redacción | Santiago de Compostela | 18/01/2023 | Actualizada ás 14:27
Telefónica e Pontegadea, o brazo investidor de Amancio Ortega, fixéronse co 100% da compañía de infraestruturas de telecomunicacións Telxius Telecom despois de adquirir o 40% que estaba en mans de KKR, segundo informou o grupo presidido por José María Álvarez-Pallete á Comisión Nacional do Mercado de Valores (CNMV).
Así, unha vez obtidas as aprobacións regulatorias e de competencia pertinentes, executouse este mércores a adquisición por parte de Pontel Participaciones, filial de Telefónica participada ao 83,35% por esta e ao 16,65% por Pontegadea Inversiones, do 40% do capital social de Telxius Telecom, a Taurus Bidco (entidade xestionada por KKR), por uns 215 millóns, nos termos sinalados cando se comunicou a operación o pasado 1 de febreiro de 2022.
Como resultado da transacción, Pontel, que era titular do 60% restante do capital social de Telxius, a sociedade que aglutina o negocio de cables submarinos de Telefónica, pasou ser o socio único desta sociedade.
Así mesmo, ambos os socios reaxustaron o seu peso na firma instrumental, de modo que Pontegadea incrementou a súa participación en Pontel ata o 30% e Telefónica pasou a ter unha participación do 70%.
Telxius Telecom conta cunha das redes de cable máis grandes e con maior potencial do mundo. Trátase dunha rede internacional de cables submarinos de fibra óptica de gran capacidade, que alcanza unha extensión de 94.000 quilómetros entre os que destacan sistemas de nova xeración como Marea, Brusa e Mistral, así como Sam-1, o sistema que conecta desde o ano 2000 Estados Unidos con América Latina.
A través da súa rede IP Tier 1, Telxius Telecom proporciona conectividade directa a internet cunha cobertura de 93 puntos de presenza e 27 estacións de amarre en 23 países, que permite conectar con éxito Estados Unidos, América Latina e Europa co resto do mundo. Ademais, Telxius Telecom conta cunha extensa oferta de servizos de capacidade, colocation e seguridade.
