O número de persoas propietarias de terreos descoñecidas está entre o 30% e 40%

Os propietarios descoñecidos de parcelas en Galicia roldan entre un 30% e 40%, con algúns casos puntuais que alcanzan o 80% en zonas nas que non está desenvolvido o catastro, segundo datos da Axencia Galega de Desenvolvemento Rural (Agader).

Recentemente, a responsable de Agader, Inés Santé, trasladou ao Parlamento galego que este problema de abandono: "É aínda maior do que pensabamos".

Así, as cifras do Goberno galego apuntaban a un "dato inicial" de que nas zonas de concentración parcelaria existe unha superficie media do 10% de propietarios descoñecidos, aínda que estas áreas de reestruturación son de gran actividade. O feito é que esta afectación se dispara en zonas onde se aplican novos instrumentos postos en marcha pola Xunta contra o abandono, en particular en zonas sen regular o catastro.

Agora, a Xunta traballa en "atallar" esta problemática cos novos procedementos e instrumentos por mor da lei de recuperación de terras. En Galicia, hai uns 11 millóns de parcelas e o 97% do chan está en mans privadas.

PROCESOS DE CONCENTRACIÓN PARCELARIA

Mentres, Medio Rural prevé completar unha trintena de procesos de concentración parcelaria no primeiro semestre de 2023. Do total, en 24 casos xa se entregaron os títulos, mentres que se fará o propio na media ducia nos próximos meses.

Os 24 procesos xa concluídos supoñen 17.400 hectáreas ordenadas, 25.500 leiras de substitución e un total de 11.300 propietarios beneficiados. A entrega pendente dos títulos de media ducia de zonas suporá sumar 3.000 hectáreas máis.

Paralelamente, entre 2021 e 2023 iniciáronse 27 novas concentracións parcelarias, aínda que desde a entrada en vigor da Lei de Mellora da Estrutura Agraria de Galicia (Metaga), en 2015, tardouse varios anos en pór en marcha as primeiras por parte da Xunta.

Estas 27 novas concentracións abarcan a un total de máis de 22.500 hectáreas e máis de 107.000 parcelas, con 15.387 titulares. Entre os últimos procesos iniciados, publicados no Diario Oficial de Galicia (DOG) a pasada semana, atópanse nove que se corresponden con sete municipios --Touro, Boqueixón, Padrón, Santa Comba, Tordoia, Melide e tres en Cospeito-.

Así, Agader apunta que se segue a máxima de iniciar un novo proceso por cada un que se conclúe. O investimento da Xunta para 2023 nesta materia supón 17 millóns --leva 118 millóns achegados desde 2009--.

MÁIS DE MEDIO MILLÓN DE HECTÁREAS

Os procesos de concentración parcelaria iniciáronse a mediados da década dos 50 do pasado século en España impulsados polo ministro franquista de Agricultura Rafael Cavestany de Anduaga.

A Xunta cifra que se actuou desde que comezaron os procesos de concentración en Galicia en máis dun milleiro de zonas que abarcan unha superficie de máis de 500.000 hectáreas, con preto de medio millón de propietarios beneficiados.

Parcelaria no monte. XUNTA - Arquivo | Fonte: Europa Press