A Xunta di que se non hai Urxencias en Moaña é porque os profesionais "prefiren" estar en Cangas
O PSOE reclama o cesamento da xerente da área de Santiago e Comesaña lamenta que se ataque a Eloína Núñez por "o mero feito de ser familia de quen é".
Por Europa Press / Redacción | SANTIAGO DE COMPOSTELA | 08/02/2023 | Actualizada ás 20:12
O conselleiro de Sanidade, Julio García Comesaña, defende que Moaña non teña urxencias porque os profesionais "levan tempo dicindo" que "prefiren estar xuntos" na PAC de Cangas para "dar unha mellor dotación".
Así respondeu a unha pregunta no Parlamento de Paulo Ríos, quen lembra que os veciños de Moaña levan "61 semanas consecutivas" de protesta para reclamar a volta das urxencias. Esixe saber "cando" van restituír o servizo, pois "xa non caben máis escusas de mal pagador".
Respecto diso, Comesaña asegura que "é certo que se podían tomar medidas para que houbese un espazo de urxencias o máis próximo a Moaña", pero "o goberno local tardou dous anos e medio en achegar a parcela", "mentres a Xunta vai resolver os seus trámites en seis meses". "Moaña podería ter unha novo PAC funcionando se o seu goberno local fose igual de áxil que a Xunta", agrega.
Así mesmo, o conselleiro de Sanidade avanzou a adxudicación este mes da obra de construción do novo centro de saúde moañés. Paralelamente, o conselleiro informou de que o pasado martes xa se incorporaron ao centro de saúde de Moaña dous novos médicos con praza fixa en quenda de tarde.
O PSOE RECLAMA O CESAMENTO DA XERENTE DA ÁREA DE SANTIAGO
Noutra pregunta, o portavoz de Sanidade do PSdeG, Xulio Torrado, reclamou a Comesaña o cesamento da xerente da área sanitaria de Santiago e O Barbanza, Eloína Núñez. "É posible que estea de acordo coa decisión, outra cousa é que poida facelo", dixo en relación ao parentesco de Eloína Núñez, curmá de Alberto Núñez Feijóo.
MÉDICO DE BAIXA EN CORRUBEDO
Noutra orde de cousas, o BNG reclamou á Consellería de Sanidade que cubra a praza de médico que está ausente no consultorio de Corrubedo, no municipio de Ribeira (A Coruña), desde o pasado mes de novembro.
FUTUROS USOS DO HOSPITAL PROVINCIAL DE PONTEVEDRA
Noutra orde de cousas, o conselleiro de Sanidade explicou que se "esperará a que terminen as obras" do novo hospital Montecelo e "logo tomarase a decisión" sobre que facer coas instalacións do actual Hospital Provincial de Pontevedra, xa que non serán necesarias para uso sanitario coa nova infraestrutura, segundo dixo.
