Os policías filipinos acusados do asasinato do coruñés Diego Bello entréganse tras un ano fuxidos
O xulgado ordenou a súa entrada en prisión sen fianza ante "a gravidade das probas acusatorias"
Por E.P. | A Coruña | 14/02/2023 | Actualizada ás 14:21
Os policías filipinos acusados do asasinato do coruñés Diego Bello entregáronse ás autoridades do país "despois de estar case un ano fuxidos da Xustiza", indican nun comunicado desde a plataforma constituída tras a morte do novo, abatido a tiros en xaneiro de 2020. Foi o embaixador de Filipinas en España, Philippe J. Lhuillier, quen llo informou.
Os tres policías,sobre os que pesaba unha orde xudicial de arresto e prisión sen fianza, entregáronse en dependencias policiais de Manila. A orde de procura e captura fora cursada o 25 de marzo. De acordo coa información facilitada á familia, os axentes entregáronse voluntariamente ao grupo de Investigación Criminal da Policía Nacional Filipina.
As autoridades xudiciais decretaron, ademais, o traslado do expediente desde a illa de Siargao, onde ocorreron os feitos, a Manila, alegando maiores medios para levar a cabo o caso e evitar atrasos por cuestións climatolóxicas e de falta de recursos.
Desde a plataforma explican tamén que o xulgado encargado do caso ordenou a entrada en prisión sen fianza dos tres policías, Vicente Panuelos, Ronel Azarcón e Niño Boy Esmeralda, "dada a gravidade das probas acusatorias que obran en poder da fiscalía, que os acusa de asasinar a Diego e de preparar probas falsas para acusalo de narcotráfico".
Ademais, o xuíz encargado do caso ordenou a celebración dunha vista por videoconferencia coas partes para o próximo día uno de marzo.
