Rueda reproba a Garamendi por comparar a súa suba salarial cunha "moza violada que vai en minisaia"

O presidente da Xunta, Alfonso Rueda, afeou as declaracións realizadas polo presidente da CEOE, Antonio Garamendi, do mércores 15 de febreiro nas que comparou as críticas á súa retribución con "cando din que hai unha violación e a moza ía en minisaia", e dixo que non lle gustaron.

"Non me gustaron esas expresións en absoluto. Pódense defender as ideas sen recorrer a esas expresións, que todos coñecemos polos medios de comunicación", manifestou Rueda, que non quixo entrar no fondo da cuestión, o incremento da retribución ao presidente da patronal.

A este respecto, limitouse a constatar que "as negociacións dentro da patronal" déixaas para eles e non vai entrar a opinar "se é moito ou é pouco", máis aló de que cre que non hai que centrarse en discusións nin "maniqueísmos, de quen é máis bo ou máis malo".

Rueda aproveitou para volver reprochar a maneira que tivo o Goberno de aprobar a subida do salario mínimo interprofesional (SMI), que "é necesario subir", dixo, pero que habería que facer "con moito máis diálogo".