Dimite a galega Isabel Pardo de Vera como secretaria de Estado de Transportes
A polémica dos trens a Cantabria está detrás da súa caída. Pardo de Vera recibiu críticas da Xunta polo atraso dos trens Avril
Por Europa Press / Redacción | MADRID | 20/02/2023 | Actualizada ás 15:27
O presidente de Renfe, Isaías Táboas, e a secretaria de Estado de Transportes, a luguesa Isabel Pardo de Vera, presentaron a súa dimisión á ministra de Transportes, Mobilidade e Axenda Urbana, Raquel Sánchez, quen as aceptou, segundo confirmaron a Europa Press en fontes próximas ao Ministerio, pola polémica dos trens de Cantabria.
Desde Transportes defenden que esta substitución "permitirá pór en marcha un cambio co que o Ministerio quere comezar unha nova etapa tanto na Secretaria de Estado como no operador ferroviario".
Estas dimisións déronse apenas unha hora antes de que a ministra se reunira cos presidentes de Cantabria e de Asturias, Miguel Ángel Revilla e Adrián Barbón, para dar explicacións sobre o problema das dimensións e o deseño dos trens de proximidade para estas dúas comunidades, que viñan reclamando tamén cesamentos, compensacións e que se axilicen os prazos para a súa chegada.
PARDO DE VERA
Pardo de Vera ingresou en Adif a través da Oferta de Emprego Público no ano 2007. En xuño do ano 2016, reincorporouse ao ente ferroviario como número dous da entidade, compatibilizando o cargo de directora xeral de Explotación e Construción de Adif co de directora xeral de Adif Alta Velocidade, cargos que desempeñou ata que en xuño de 2018 foi nomeada presidenta de ambas as entidades públicas, responsabilidade que veu desempeñando desde entón.
Así, Pardo de Vera abandona o seu cargo tras recibir críticas por parte da Xunta nos últimos tempos en relación co atraso dos trens Avril. Queda pendente a reparación do viaduto derrubado do Castro, na autovía A-6 que conecta as provincias de Lugo e León, unha actuación pola que tanto Xunta como PP e BNG reclamaron explicacións á ministra de Transportes, Raquel Sánchez, e a Pardo de Vera.
Igualmente, o Ministerio de Transportes ratificouse recentemente no compromiso do Goberno central co saída sur do AVE en Vigo, unha infraestrutura sobre a que Isabel Pardo de Vera prometera executar antes de 2040. O Goberno galego apuntou nun informe a unha demora da conexión ferroviaria entre Vigo e O Porto por falta de avances.
En 2022, Isabel Pardo de Vera recibiu a Medalla de Ouro de Vigo por ser a persoa que moveu "con máis forza, ímpeto e carácter a ruptura do illamento por infraestruturas" da cidade, segundo reivindicou o alcalde, Abel Caballero, quen destacou a súa aposta por retomar o estudo do AVE Vigo-Ourense por Cerdedo, así como o saída sur ferroviaria da cidade.
