Comesaña defende o sistema de atención de pacientes por persoal que non é sanitario en centros de saúde
Di que a través do sistema Xide o paceinte que acude ao centro médico pode ser atendido por un profesional, que a pesar de non ser sanitario, si é "traballador do centro de saúde".
Por Europa Press / Redacción | SANTIAGO DE COMPOSTELA | 21/02/2023 | Actualizada ás 13:59
O conselleiro de Sanidade, Xullo García Comesaña, asegurou este martes que é "de sentido común" o establecer un sistema de xestión da demanda nos centros de Atención Primaria, aínda que o seu departamento está "aberto ao diálogo" e a "mellorar" a proposta se hai achegas.
A preguntas dos medios, Comesaña defendeu o sistema Xide que a Xunta implantou nos centros de saúde para, a través de 700 criterios de citación, dirixir ás persoas que chegan sen cita previa ao profesional máis adecuado ao seu motivo de consulta.
Así, o consellerio lembrou que o sistema se pilotou en dous centros de saúde con resultados "moi positivos" e apuntou que o profesional que recibe ao paciente, a pesar de non ser sanitario, si é "traballador do centro de saúde" e "ten os mesmos compromisos de confidencialidade de calquera traballador".
En todo caso, precisou Comesaña, "se o paciente non quere usar ese sistema e quere ser visto polo médico, pódeo facer", engadiu.
A mellora da Atención Primaria, dixo o responsable da sanidade galega, require de "traballo en equipo" e a creación dunha ferramenta para mellorar a xestión dos pacientes "é unha demanda histórica dos médicos". "Parécenos de sentido común", dixo Comesaña, que admitiu, no entanto, que "calquera sistema é susceptible de melloras" e dixo que na consellería están "abertos ao diálogo" e "ao consenso".
