Atopan dúas novas granadas de man en Corcubión

Unha persoa atopou dúas granadas de man no rexistro da propiedade da localidade coruñesa de Corcubión, segundo confirmaron fontes da Garda Civil a Europa Press.

O achado produciuse á primeira hora da mañá deste luns e efectivos do Instituto Armado desaloxaron e acordoaron a zona do edificio.

Ademais, foi mobilizado un equipo de especialistas en explosivos, que se desprazaron ata o lugar para verificar se as granadas tiñan carga e se estaban activadas. Finalmente, os especialistas comprobaron que se trataba de armas reais aínda que non tiñan carga. Un equipo da Policía Xudicial da Garda Civil encárgase agora da investigación dos feitos.

Unha das granadas atopadas no rexistro da propiedade da localidade coruñesa de Corcubión | Fonte: GARDA CIVIL