Rueda avoga por "deixar que ENCE poida traballar e crear riqueza" con "toda a seguridade xurídica"

O presidente da Xunta de Galicia, Alfonso Rueda, mostrou o seu respecto á decisión do Concello de Pontevedra de recorrer ante o Tribunal Constitucional a sentenza do Supremo que avala a prórroga para a permanencia da fábrica Ence nos terreos da ría en Lourizán, pero non a comparte e avoga por deixar á empresa seguir traballando.

O presidente da Xunta, Alfonso Rueda, acompañado polo vicepresidente primeiro e conselleiro de Economía, Industria e Innovación, Francisco Conde, nunha reunión co Consello de Administración de Ence | Fonte: Europa Press

"O Concello está no seu dereito de expor os recursos que estime convenientes, pero a sentenza é bastante categórica", sinalou Alfonso Rueda este martes nun encontro cos xornalistas no transcurso dun acto en Pontevedra.

O titular do Executivo autonómico engadiu que "habería que deixar que, con todos os requirimentos ambientais máis estritos, unha industria moi importante para Pontevedra e toda Galicia poida traballar e crear riqueza con toda a seguridade xurídica".

Neste sentido, o presidente do Goberno galego considera que é necesario "esixirlle a Ence o cumprimento estrito de todos os seus compromisos, que son moitos" e adiantou que "a Xunta llo vai a esixir".

Rueda puntualizou que a el non lle gusta falar de empresas, "senón de familias que dependen dela", insistindo en que "é necesario un pouco de tranquilidade, de perspectiva cara adiante e seguridade".