‘Primavera de portas abertas’ na Ruta do Viño de Valdeorras
As xornadas, que mergullarán ao visitante en Valdeorras, desenvolveranse do 5 ao 7 de maio e contemplan actividades de carácter turístico, cultural, gastronómico e deportivo.
Por Galicia Confidencial | O Barco de Valdeorras | 13/04/2023 | Actualizada ás 09:00
A Ruta do Viño de Valdeorras poñerá en marcha a XII edición das Xornadas de Portas Abertas a fin de semana comprendida entre o venres 5 e o domingo 7 de maio. Por certo, este ano pasarán a denominarse “Primavera de Portas Abertas da Ruta do Viño de Valdeorras”.
Segundo explica o presidente da entidade dinamizadora, Joaquín Sánchez, “trátase dunha fin de semana ideal para mergullarse de xeito integral nun territorio amparado que ofrece aos visitantes un amplo abano de activos e recursos naturais, patrimoniais, enolóxicos e gastronómicos para gozar dende o punto de vista turístico”.
Unha das novidades desta edición é unha actividade deportiva que consistirá nunha ruta de eBike de 42 quilómetros para coñecer a Serra da Enciña da Lastra, enclave paisaxístico senlleiro na contorna.
ACTIVIDADES E INSCRICIÓNS
A organización ofrece nesta ocasión unhas quince actividades que poden gozarse en solitario, en parella, en familia ou con amigos/as segundo se prefira e o permita cada acción.
Ademais da ruta de eBike, haberá outras: cantos de taberna con degustación de produtos e viños da zona, visitas a enclaves de extracción e transformación da pizarra, charlas sobre historia e patrimonio con cata final, andaina por un tramo do Camiño de Inverno, unha merenda entre cepas, visita ao Castelo do Bolo, karaoke entre tapas e viños, paseo entre viñedos e lagares acompañados dun arqueólogo en Larouco, visita ao casco histórico do Barco, etc.
As persoas interesadas poden facer a inscrición para participar nas actividades que se ofrecen a través dos formularios que se atopan na web da Ruta do Viño de Valdeorras.
